Upplýsingamiðlun
Fagleg og hlutlaus upplýsingagjöf til heilbrigðisstarfsfólks og lyfjanotenda er eitt af lögbundnum hlutverkum Lyfjastofnunar
Stofnunin hélt áfram að miðla faglegum upplýsingum á lyfjastofnun.is og samfélagsmiðlum en að auki voru kynntar ýmsar nýjungar í upplýsingamiðlun vegna lyfjaskorts á sérlyfjaskránni/lyf.is. Við tókum á móti mörgum góðum gestum á fundi og kynningar en á árinu var okkar stærsti viðburður afmælismálþing af tilefni 25 ára afmælis stofnunarinnar. Umfjöllunarefnið var fölsuð lyf og var málþingið vel sótt og heppnaðist með ágætum.
Málakerfi
Ýmis verkefni eru stofnuð í málakerfi Lyfjastofnunar. Þar falla meðal annars undir erindi og fyrirspurnir sem fela í sér mat eða afgreiðslu fagsviða, verkefni sem eiga upphaf sitt innan stofnunar en er miðlað til hagsmunaaðila, gögn sem berast reglulega og fara þarf yfir, málefni sem vinna stendur yfir við í lengri tíma og fundargerðir vegna lögbundinna verkefna stofnunarinnar. Sum þessara verkefna geta spannað allt að ár í vinnslu.
Kapp er lagt á að svara málum eins fljótt og hægt er, án þess þó að gæði svara minnki.
Traust til Lyfjastofnunar
Á ári hverju tekur Lyfjastofnun þátt í traust- og þekkingarkönnun Gallup. Könnunin var framkvæmd í upphafi ársins og kom ágætlega út. Litlar breytingar voru á niðurstöðum milli ára. Helstu niðurstöður voru þannig að 54% sögðust bera mikið traust til Lyfjastofnunar og 22% sögðust þekkja vel til starfa Lyfjastofnunar. Lyfjastofnun telst þannig til stofnana sem njóta meira trausts en minni þekkingar.
Heimsókn frá fyrrum starfsfólki
Fyrrum starfsfólki Lyfjastofnunar, 65 ára og eldri, var boðið í afmæliskaffi þann 12. nóvember í tilefni þess að 1. nóvember voru 25 ár frá stofnun Lyfjastofnunar í núverandi mynd enda ekki síður afmæli þeirra en okkar sem enn störfum hjá stofnuninni.
Afmælismálþing
Haldið var málþing á Grand Hotel um Fölsuð lyf þann 6. nóvember. Tilefnið var 25 ára afmæli Lyfjastofnunar þann 1. nóvember.
Málþingið hófst á ávarpi heilbrigðisráðherra, Ölmu Möller, sem flutti hamingjuóskir og þakkir fyrir vel unnin og mikilvæg störf. Í framhaldi héldu Andrea Þórhallsdóttir, eftirlitsmaður hjá Lyfjastofnun, Martin Burman, formaður samevrópsks vinnuhóps sem vaktar ógnir í framleiðslu og dreifingu lyfja, Guðlaugur Ómar Tómasson hjá tollgæslusviði Skattsins og Adam Erik Bauer verkefnastjóri hjá Rannsóknarstofu í lyfja- og eiturefnafræði erindi frá sínum fjölbreyttu sjónarhornum.
Fundur vegna lyfjaskorts 2025
Haldinn var fundur með hagsmunaaðilum um lyfjaskort og nýjungar í miðlun upplýsinga vegna hans. Um 40 manns mættu á fundinn, fulltrúar frá heildsölum, markaðsleyfishöfum, Landspítala, Sjúkratryggingum, Heilsugæslu höfuðborgarsvæðisins og hagsmunasamtökum.
Almenn ánægja var með fundinn, bæði hjá fulltrúum Lyfjastofnunar og gestum.
Vísindaferð Tinktúru og heimsókn nema
Tinktúra, félag lyfjafræðinema við Háskóla Íslands, kom í vísindaferð til Lyfjastofnunar í september. Starfsfólk stofnunarinnar sagði sögu hennar, og farið var yfir hlutverk á sviði markaðsleyfa og eftirlits.
Hefð hefur skapast fyrir því að lyfjafræðinemar á 1. ári fái kynningu á Lyfjastofnun. Í október komu þau til okkar og fengu kynningu á daglegum störfum, starfsfólki stofnunarinnar og hlutverki.
Lyf eru ekki nammi
Í september tók Lyfjastofnun þátt í átaksverkefni á samfélagsmiðlum með öðrum lyfjastofnunum Evrópu til að vekja fólk til umhugsunar um að umgangast lyf á öruggan hátt.
Skilaboðin voru einföld, lyf eru ekki nammi.
Hlaðvarp Lyfjastofnunar
Hlaðvarpið er mikilvægur miðill sem nýtist við miðlun efnis þar sem kafað er dýpra í þau málefni sem varða hlutverk stofnunarinnar. Hlaðvarpið er í umsjón Hönnu G. Sigurðardóttur.
Ekki gafst færi á að gefa út þátt á árinu en þættir fyrri ára eru aðgengilegir í öllum helstu streymisveitum s.s. SoundCloud, Spotify og Apple Podcast.
Alþjóðlegt átak um lyfjagát
Lyfjastofnun tók þátt í átaki Uppsala Monitoring Centre eins og fyrri ár sem miðar að því að vekja athygli á lyfjagátarkerfi lyfjayfirvalda og fjölga tilkynntum aukaverkunum. Þetta var í tíunda sinn sem átakið er haldið. Skilaboðin að þessu sinni voru:
- Bæði ég og þú, getum haft áhrif á öryggi lyfja
- Við höfum öll kraftinn til að tilkynna um aukaverkanir
- Með því að tilkynna um aukaverkun getur þú haft áhrif á öryggi lyfja, öllum til heilla
