Lyfjabúð af meðalstærð

Samantekt um starfsemi apóteka sýnir að apótekum fjölgar ekki milli áranna 2020 og 2021. Lyfjaávísunum hefur hins vegar fjölgað jafnt og þétt frá 2017 eða um 17,7%.

Í lok árs 2021 voru 74 apótek starfandi hér á landi auk sjúkrahúsapóteks Landspítalans, samtals 75 apótek*. Á árinu hættu tvö apótek starfsemi. Lyfja hf. og Lyf og heilsa hf. voru stærstu apótekskeðjurnar, Lyfja með 22 apótek og Lyf og heilsa með 27 apótek í rekstri. Tvær aðrar keðjur sem hvor um sig hafa 3 apótek í rekstri eru starfandi í landinu, annars vegar Lyfjaval ehf., hins vegar Lyfsalinn ehf. Lyfjaval ehf. og Lyfsalinn ehf. eru í eigu sama aðila.

Auk apótekanna eru 28 lyfjaútibú í rekstri á landinu. Lyfja hf. Lyf og heilsa hf. eru umsvifamest í rekstri lyfjaútibúa, Lyfja með 23 útibú og Lyf og heilsa með 4. Alls eru 2 útibú í flokki eitt, 14 útibú í flokki tvö og 12 útibú í flokki þrjú. Langflest útibú eru starfandi á Norðurlandi eða 10 talsins. Upplýsingar um mismunandi tegundir lyfjaútibúa og skilgreiningar á þeim má finna á vef Lyfjastofnunar.

Á landsbyggðinni eru reknar fjórar lyfsölur í tengslum við rekstur heilsugæsla til að tryggja lyfjadreifingu þar sem langt er í næstu apótek.